2017復活節15-16/4兩日一夜中山澳門團 May 3, 2017 15:02 1 Comment

第一日由深圳去中山(155km)，頭半段尚算順利(雖然都有意外)，但虎門過江後，就由車友一句: 「冇理由咁順利嘅，呔都冇爆一條」.... 事情就開始出現問題啦....

踩下踩下，去到一條未通車嘅大橋。心諗正啦，路又靚又無車，仲唔爆住去。點之…咁大風嘅，頂風到不得了，條橋唔知叫咩名，就叫佢做「頂風大橋」啦。過左頂風大橋後繼續踩，本來要再過一條橋去中山嗰邊。但前面封路，[大橋隨時坍塌，禁止車輛行人通行] 唔係瓜，冧橋!?

唔過得，點搞…兜路，要踩好遠喎…咁唯有去附近油站補補水，再睇下點算啦。咁响油站坐低揾路，發覺都係兜路好遠，未必趕得切去中山，想call車，偏僻地方又call唔到…問一問油站叔叔，話前面有個叫「九涌」嘅地方，有駁船去到對面岸，經過一番討論，大家就決定9衝去「九涌」~ 衝左一輪，又經過村落，終於到個碼頭仔啦，咁拿拿聲上船過對岸。

上岸後，行程繼續，但我地仍然响偏僻村落中。天開始暗，要加快腳程啦，就响我地趕路之際，POP!!一聲，有車友爆呔…咁立即搶救啦，睇睇條外呔，個窿都幾大，用$10蚊紙急救大法封住個窿，搞一輪後再起行。點知都係救唔到，又無外呔係手，點算!? 入村問人有無得叫白牌車，佢地話呢度好偏僻，叫唔到車…最後車友要連埋架單車一齊上架電單車，出返個鎮，轉白牌車先去酒店報到。

個時天已黑齊，仲有30幾km，我地都要立即趕路了。但條路，咁爛嘅!? 好似踩緊石板路古典賽咁嘅，櫈到阿媽都唔認得，天又黑齊，靠支車燈睇路，無炒車已經好好彩，最後都總算捱過，到返正常石屎路了。

最後啦，肚餓啦，亦都無其他選擇啦，唯一策略: 9衝!! 就係咁，餘下廿幾三十km就一路9衝。越肚餓，就越唔停。越肚餓，就越9衝~

最後無記錯大約20:35左右終於到達酒店，我地都振臂狂呼。熄Garmin!! (提一提: 我地原先係預計4-5點到達的…)

到後，立即上房沖涼換衫出去揾野食，再試中山馳名雙皮奶，再去按腳~ 之後先返去訓，準備第二天行程: 中山 > 澳門